《سلام》
سلاملار سایقیلار  قارایا آغا
دنیزه دالغایا دره یه داغا
چیچگه یارپاغا آغاجا باغا
جانلی یا جانسیزا هر کسه سلام
یئر اوسته وار اولان هر نه سه سلام

اردبیل تبریزه آزربایجانا
اورمویا قزوینه هم ده زنگانا
تهرانا ایرانا کل جهانا
عشق اولسون باریشا جان آتانلارا
سئوگی یه شنلیگه باش قاتانلارا

وطن سئوگیسینه کهلیگیم آزیب
سلاملار سایقیلار تبریک لر یازیب
اورک ده نقش ائدیب داش اوسته قازیب
میندیردیم شعریمه تاپشیردیم یئله
گؤندردیم غیرتلی شرفلی ائله

سلاملار سایقیلار بو گؤزل یازا
آشیقلار باغرینا باسیلان سازا
دوستلارین سسین دن گلن آوازا
تزه ایل بایرامی موبازو اولسون
کونلونوز شنلیک له شادلیقلا دولسون

قوجایا،ایگیده ، اوشاغا سلام
قونشویا،قونوما،قوناغا سلام
دوز چؤرک یئدیگیم اوجاغا سلام
عشق اولسون "آیدین" دان آی یا اولدوزا
وطن ده یئدیگیم چؤرگه دوزا
آیدین قوجا

فایل صوتی شعر (بایرام)
http://azerbaijani.arzublog.com/uploads/azerbaijani/___-__.mp3